環境舒適服務貼心 ~Urban Cafe~

係旺角，通常朋友第一個反應係周圍都係人。加上有番咁上下年紀，都唔多想迫，所以朋友好少揀旺角呢區聚腳啦！

今次信義妹不斷提及 Urban Cafe 搞到朋友都為咗我去一趟旺角。點解會提及呢？因為之前因工作關係偶然到Urban Cafe 環境同鬧巿成為強烈對比，服務又貼心，確實與朋友談心底話的好地方。

講番食既先，點了 set dinner $268

是日餐湯～粟米濃湯～
濃湯甜而不膩，口感豐厚，唔會稀如水，倘有少量粟米粒加添口感。

是日沙律
沙律菜新鮮唔會帶苦澀味，配上香滑的芝麻醬開胃又醒神
主菜有好幾樣選擇，有飯，意粉，肉。

西班牙黑毛豬肋骨配薯菜
淋度適中，容易切開又唔會成件骨肉分離。肉質亦都唔會太實，女仔可以保持儀態溫柔地食。味道帶少少甜，屬濃味，如果食開比較清淡會覺得有少少鹹，但配上伴碟的沙律菜味道就剛剛好啦！而薯菜係薯角，外脆內軟，喜歡香口的一定鐘意。

雙重芝士肉醬意大利麵
芝士控的信義妹係唔放過架！濃濃的芝士配上彈牙意粉。肉碎與蕃茄醬配合剛好，唔會太多醬，醬汁剛好可以將意粉拌好。鹹度適中，蕃茄醬唔會太酸，與芝士味的鹹配搭恰到好處。

套餐包$38飲品一杯，可以補差價點其他飲品。我地補$4， 點了熱的蜂蜜紅棗茶，為晚餐畫上完美的句號。

地址: 旺角彌敦道566-568A號僑建大廈2樓