不少準媽咪想請陪月都會選到唔少問題，始終陪月呢一行都幾靠口碑，加上金額唔細之餘，又要預早至少六至七個月預訂，一不小心請咗個唔專業嘅陪月，可以搞到家無寧日，大大增加新手媽媽嘅壓力，影響休息。以下就有幾條問題喺大家請陪月之前要留意：
1. 我究竟負唔負擔到請陪月？
依家一般請一個每日工作9個鐘嘅陪月大約2萬蚊，當然價錢有平有貴，一些星級過夜嘅陪月可以索價5萬，地區偏遠可能會有附加費，而大家要留意坐月嘅買餸錢係另計，以我為例，一個月嘅陪月費要大概$2,7000埋單。如果各位準媽咪計劃請兩個月的陪月，就要更加做好理財預算，這隨時係一筆大支出。
2.媽咪或者奶奶會唔會幫手坐月？
簡單嚟講人多自然意見多，如果媽咪或者奶奶自動請纓幫手做陪月，我勸大家都係唔使請陪月。一嚟代表媽咪同奶奶好得閒，到時一定會幫手， 亦會對湊BB同坐月餐單有好多意見，為免到時手心又肉、手背又肉，影響屋企人關係，倒不如請媽咪或者奶奶幫手。
3.陪月同自己嘅性格夾唔夾？
強烈建議準媽咪要叫埋老公一齊見陪月，透過面試了解陪月嘅性格，究竟佢係好平易近人，還是非常堅持己見嘅陪月。試想想，屋企有8個鐘多咗個人係度，仲要用您嘅廚房、廁所同睡房，媽咪同屋企人都需要時間去磨合同相處。另外，建議準媽媽不能對家裡的大小事務過份執著，切記坐月的最大目的是養好身體，迎接未來陪BB成長嘅路。
4.陪月係咪朋友介紹？
有口碑嘅陪月當然是最理想的，媽咪可以從其他人口中略知陪月嘅性格、習慣同埋強項，大家有咗expectation 當然會比較易相處。例如，有些陪月對食療非常有究竟， 閒時大家交流下養生美容嘅方法，概可以學嘢，又可以增進下感情。
5.陪月係新派定舊派方法坐月？
部份較老派嘅陪月對一些老傳統非常執著，例如坐月唔可以沖涼洗頭，只可以用薑水抹身，十二朝、滿月有儀式等。若果家中老人家都傾向較為傳統，可能舊派陪就會較為適合。相反，若果陪月係較為新派，坐月著重排走惡露多過進補，相信到時必定會惹起老人家嘅不滿。
坐月絕對係一次過向新手媽媽嘅耐性、體能同人際關係挑機，但回想返BB一日一日咁長大，所有辛苦同困難都係值得㗎。希望大家可以揀到個幫到手又可靠嘅陪月。
