韓國嘅女仔大部份身材都好好，著衫好好睇。除咗得天獨厚外，唔多唔少係因為佢哋好識得揀內衣。最近喺facebook pop up見到韓國內衣品牌DOROSIWA，入咗官網睇吓，個個款都覺得好靚！小試牛刀我入手咗兩款bra&內褲set，睇下佢哋啲品質點先！而家同大家開箱，如果你都心動過想試呢個brand，不妨睇吓我嘅comment。
雖然品牌係韓國，但佢哋應該有個office喺台灣，所以你見官網有繁中，文字同網頁design都帶台灣風，我覺得OK嘅，係有時有啲位有少少複雜唔係睇得好明（例如幾時係套裝幾時係得個bra）但想買嘢點會難得到女人吖，摸索摸索就落單了。產品由韓國出貨寄嚟香港，唔係用港人用開嘅速遞公司，但追蹤單號等等都有充足嘅資料，大概一個星期左右送到嚟，包裝如上，乾淨同幾清爽，比起淘寶嗰啲灰塵滿佈嘅感覺好N倍。
入到DOROSIWA官網，第一時間係見到好多噴血級嘅美女model。款式由低調到sexy小惡魔都有。我今次入手嘅款式係「量力而為」形，舒適為主，希望比大家參考下品牌嘅質量。呢一set係完美無痕柔色舒適內衣褲組 https://bit.ly/3GxrFU7 淺軍綠色。實物隻色係幾靚，粉綠色。呢款共有六隻色可以揀，隻隻色我都覺得好靚㗎其實！
無痕無縫，著啲貼身衣物都唔會顯露內衣形狀係而家嘅內衣新趨勢，DOROSIWA呢款嘅造功係幾唔錯。質料係Nylon，柔軟同堅韌，透氣度亦十分之高，啱晒香港呢啲悶熱潮濕嘅天氣。
杯位唔係車實，可以換胸墊，附送嘅胸墊係基本款，冇豐胸效果但就肯定係舒服。留意返，呢個款嘅bra有S至XL碼，背部係冇扣款，即係背心款嚟，買嘅時候唔洗過份考慮杯位，因為只係胸墊，隨時可以換。但就要需要考慮自己著唔著得落，例如背脊多啲肉嘅胖妹子，可能買大少少會方便穿著。
內褲都係無痕無縫，波浪紋cutting帶啲少女味。私密部位內里係純棉，貼身舒服。內褲free size，臀圍約90～95cm，自行考量著唔著得落。如果覺得自己唔需要條底底，可以試下唔好買啲「內衣褲組」
點解我會想試完美無痕柔色舒適內衣褲組，原因係我本身都係著開sport bra呢啲舒適系嘅內衣。舒適係唔係等於冇美感？又唔係喎，DOROSIWA呢款有sport bra嘅舒適感，舉手、跑步等等大動作都冇上下左右移位問題，肉肉包覆得好好，冇副乳，胸部嘅肉有一定嘅承托，有返個shape，由於呢個款唔係豐胸形，著起上嚟我覺得係好睇唔誇張，係適合日常返工返學嘅款式，幾百搭！
另一款我入手嘅係[Tsumeru] 爆乳營造專家內衣褲組 https://bit.ly/40X2cvw 聽個名都感受到係豐胸款。一樣係有6個顏色選擇，我呢隻係灰色，實物係淺粉灰。
push up款我最怕就係唔舒服，但呢隻係冇鋼圈，摸上手係軟綿綿㗎，感覺相當舒適。個cutting係一片無縫，彈性唔錯。杯位用咗呢隻有啲窿窿嘅布料，有透氣度，唔會太焗。
要push up首先係要將背脊嘅肉包覆得好，粗背帶cutting夠力將啲肉推去前面，然後配返個三隻眼嘅背扣增加力度。
內褲一樣係無痕式，私密部位係棉質。呢一set內褲有4個size可以揀，感覺就人性化好多喇。
話到明係push up，誇張啲就一定㗎喇。我著間條衫去突顯返個before and after比大家對比下先。講真，上網買bra最怕係比model誤導咗自己，但DOROSIWA我覺得就幾均真嘅。作為波平如鏡嘅我，帶呢個[Tsumeru] 爆乳營造都OK carry到，最緊要係冇離罩，因為佢真係幫到我將背脊啲肥肉推返上前面，感覺係舒服，冇鋼圈唔會覺得個雞心位有嘢頂住。我覺得人生點都需要入手返個爆乳款，喺一啲場合著某類型嘅衫的確係需要利用到佢嚟增加美感。
DOROSIWA同其他網上內衣店有咩分別？
首先佢有台灣office，用返中文溝通點都方便啲。其次係佢嘅款式夠多，有sporty亦有elegant，更加有啲playful啲增加情趣系列，真係總有一款射中你紅心。Model們多採用A cup真人，有幾款甚至用加大碼model，比到一個概念自己著上身會點樣，唔會太離譜太假。每個款式碌到落去下面有購買／size嘅小貼士，有埋個calculator自己計，夠晒貼心。
收到嘅產品包裝係整齊同埋冇嗰種「淘寶式灰塵」，quality方面我覺得的確係做得唔錯。至少我入手嘅兩款感覺係良好。但假若不幸遇到問題需要退款退貨，有香港office（客服可能係台灣嗰邊）台灣嘅中文我覺得點都易明過淘寶話…（你懂的親）溝通上應該不成問題。
總括嚟講，今次網購內衣challenge係十分成功！DOROSIWA冇伏，想試嘅sis可以放膽入手！
