熱門瘦面療程比一比：分享試做 New Beauty Ultra V Lift Pro 無針埋線 V.S. Oasis HIFU 療程
瘦面對女人嚟講，真係稱得上係頭等嘅大事！試諗吓，同班frd影完相，個個塊面都尖到女神咁，唯獨係你一個塊面大過pizza，如果P圖又無可能叫班frd P埋一份架嘛，到時被人發現人地原圖直出，得你一個P咗圖，都咪話唔𤓓呀！
不過，包包面絕對唔係絕症嚟嘅，有得「醫」架嘛~講緊係「醫美」個「醫」呀~而家有好多美容院都有瘦面療程，話可以減走包包面、雙下巴、去水腫，做完之後包保塊面即刻尖10倍咁話！到底呢啲瘦面療程係咪真係work呢？相信好多女仔都好想知！今次我就分享一吓早排我試做嘅2個瘦面療程，睇吓醫美療程究竟係咪可以搞得掂包包面啦！
講一吓我自己嘅問題先，其實早幾年我塊面都唔係太肥，但唔知點解一過咗25歲，就發覺面皮鬆咗又dur咗，照鏡硬係覺得個樣老咗好多，有時影相打卡，都會見到個下顎線好似消失咗咁，面部輪廓腫咗好多……無論搽幾多瘦面精華，都好快打回原形，我自己又懶，唔係成日按摩塊面喎……所以先至諗，醫美療程用嘅能量勁咁多，一定比齋用護膚品同按摩更快瘦到面啦！
於是我上網睇完又睇，千揀萬揀，終於俾我揀到2個好似幾啱我嘅瘦面療程，而且2個療程都有得網上登記試用，於是乎，我就決定去試試，睇吓可唔可以K.O.我個包包面！
瘦面療程分享1. Oasis – 旋風式 HIFU 療程
我第一個去試做嘅，就係 Oasis Medical 嘅 HIFU 療程。HIFU 不嬲都係瘦面「首選」，好多女仔到咗一定年紀，覺得塊面唔夠firm，都會去做HIFU收一收塊面。
其實而家好多美容院都有HIFU，但點解我會揀Oasis呢個HIFU療程呢？原因好簡單，就係佢係大品牌之餘，仲會由醫生親自同你做療程！仲有Oasis最近推出咗第6代旋風式HIFU，比起上一代升級咗唔少，而且仲有試做優惠添~
記得我去到Oasis個陣，開始做HIFU之前，會有個顧問嚟同我傾吓偈，話係事先了解吓我有咩皮膚問題，再簡單咁講解吓Oasis嘅HIFU療程原理，同埋陣間嘅流程咁樣，就咁睇同普通美容院就冇咩分別咁~
之後顧問就帶我入一間房到見醫生啦~Oasis有一樣嘢好就係會由醫生親自進行療程，對客人嚟講，的確係幾放心嘅~聽人講做HIFU都幾痛吓，所以我都幾擔心醫生用部機打落嚟會好痛，於是我問醫生會唔會搽麻膏，不過醫生就話因為做HIFU係會入到皮下筋膜層，而麻膏嘅麻醉作用只限於表皮，所以做HIFU就算搽麻膏都唔會幫到幾多……至於過程痛唔痛，就要視乎每個人嘅皮膚狀況同受痛能力，一般嚟講，牙骹同近骨嘅位置，會比較大感覺~
說時遲那時快，醫生已經準備幫我打HIFU，佢先幫我係牙骹位攝兩舊棉花，隔一隔啲能量，咁打到落牙骹位個陣就會冇咁痛。醫生首先幫我用4.5mm嘅探頭開始打，4.5mm即係會入到筋膜層，亦即係SMAS。SMAS係脂肪同肌肉之間嘅薄膜，如果呢層SMAS開始鬆弛嘅話，就會令成塊面都dur皮啦！
第一下4.5mm探頭打落面係有少少痺痺痛痛嘅感覺，不過都叫做接受得到，唔會痛到標眼水咁囉~可能個兩舊棉花真係有啲用，打牙骹位個陣個痛感冇想像中咁大，之後打額頭同雙下巴就比較大感覺，一來可能額頭近骨，二嚟我個雙下巴好嚴重，所以醫生就較高咗個能量，不過對我嚟講，都仲係可接受嘅範圍嘅~
打完4.5mm，醫生會再轉3.0mm嘅探頭，全面打多一次。打完4.5mm之後，再打3.0mm嘅感覺細好多，的確係冇咁刺激~總括嚟講，全程都冇話覺得勁痛、勁唔舒服，打嘅過程大約20至30分鐘左右就完成，當休息一吓都幾好~
效果方面，剛剛打完會有少少拉提效果，不過HIFU療程一定要俾時間，等皮膚生返啲膠原BB修復一下，先至會有最佳效果~Oasis HIFU療程官方話大約2星期左右就會有最佳效果，咁我覺得瘦面效果係有嘅，不過要好仔細睇先見到效果，雙下巴都firm咗少少，dup低頭個陣望落都冇咁鬆。不過做完療程之後，牙骹位同下巴按落去會有少少痠軟感覺，大約2個星期就消失曬，雖然唔會好唔舒服，但我expect有感覺嘅話，個瘦面效果應該會再明顯啲……
瘦面療程分享2. New Beauty – Ultra V Lift Pro 無針埋線
試完Oasis嘅HIFU療程之後，坦白講有少少失望，不過講真呢啲HIFU療程如果唔係最高能量嘅話，真係要做多幾次先會好好效果~過咗大半年左右，我覺得係Oasis打HIFU嘅效果都消失得7788，於是又再開始搜尋一下有咩瘦面療程啱我做~咁啱個排興緊一種叫做「無針埋線」嘅treatment，於是我就決心搵間無針埋線嚟試試~
之後係Facebook見到New Beauty賣緊廣告，新推出嘅 Ultra V Lift Pro 無針埋線療程做緊promotion，只要網上登記就可以免費試做一次，比起之前Oasis要俾幾百蚊試做，New Beauty免費試做呢一點係好吸引！不過唔少人又會擔心「平嘢冇好嘢」，到底New Beauty會唔會係黑店呢？
身為「美容小先鋒」嘅我，當然要試一試啦！網上登記咗之後，好快就收到確認message，之後到咗Booking個日，上去舖頭show個message就可以~成個過程都好方便！
去到New Beauty之後，有位顧問好快帶咗我入間房，佢先幫我用部儀器做一個皮膚分析，雖然望落好似好簡單，但部儀器會完全show曬我面上嘅「瑕疵」，好似色斑、皺紋，仲睇到水分、膠原蛋白足唔足夠等等。之後顧問仲會了解吓我最想改善咩問題，好似我比較concern雙下巴、面部輪廓咁，佢就會suggest我可以做咩療程改善，同埋平日係護膚習慣上可以注意咩問題等等，呢part都至少15分鐘，可能有人覺得會多舊魚，但我反而覺得呢part可以幫我更加了解自己皮膚有咩問題，之後返屋企護膚都可以注意多啲嘛~
完咗呢part，當然就係入戲肉啦！顧問帶我去另一間房，交俾另一位治療師幫我做無針埋線。訓上床之後，治療師會同我簡單清潔一下塊面，再較好儀器度數之後，就會開始打落塊面度~無針埋線一共有3個探頭，分別係1.5mm、3.0mm同4.5mm，比起Oasis HIFU療程就多咗一個1.5mm，可以更加針對表皮真皮層~
New Beauty 無針埋線同樣會先由4.5mm探頭開始打起，同HIFU嘅方形探頭有啲唔同，無針埋線嘅探頭係筆形，一路打落面嘅時候，需要一路打圈，咁樣可以令到能量更加均勻咁入到面部底層~無針埋線嘅4.5mm探頭打落塊面到都無咩感覺，就算去到眉骨、顴骨啲位都好舒服，只係有少少熱熱地嘅感覺，唯一比較大感覺嘅係雙下巴，打個時有少少痠軟，不過好快就會冇咗~
之後就會轉用3.5mm同1.5mm探頭各打一次全面，打4.5mm已經感覺好輕微，其餘2個探頭更加可以話係冇感覺，3個探頭打完全面都只係30分鐘左右，之後敷返一個水分面膜就完成啦！
做完療程個吓，我覺得效果都幾明顯，下顎線拉返上去，虎紋位都淡咗少少，整體效果我都幾滿意！清理乾淨之後，就會有位顧問帶我去另一間房，同我大致講吓而家無針埋線有咩package同埋優惠，仲有會講吓返屋企之後，要點樣護理皮膚，成個感覺都唔hard sell，唔會一味chur住要我快啲俾錢，但因為我想睇多段時間睇吓療程個持久度，所以最後都冇買到任何plan，輕輕鬆鬆就走人lu~
至於無針埋線個持久度，New Beauty嘅顧問話大約2至3個星期，等膠原蛋白生出嚟，個效果就最好啦！咁每日我都有照吓鏡、影吓相，發覺雙下巴都真係Firm咗幾多吓！同朋友出去食飯，個個都問我點解塊面firm咗咁多！最重要係影相個陣，個下巴線條出返嚟，側面睇仲明顯，成個人即刻多返少少氣質！
總結：Oasis HIFU 定 New Beauty Ultra V Lift Pro 無針埋線療程好啲？
好啦~嚟到最後總結一下先，其實Oasis同New Beauty都係十分受歡迎嘅香港美容院，好多女仔都有幫襯過佢地架，而且佢地提供嘅美容療程都好多元化，有興趣嘅女仔都可以自己上網了解一吓~
講返今次去Oasis試做HIFU同New Beauty試做 Ultra V Lift Pro 無針埋線嘅心得先~Oasis嘅HIFU療程重點就係全程由醫生負責做，唔少人始終覺得由醫生做返療程，信心都會大啲~至於效果方面，我就覺得都有效果嘅，一打完Firming都幾明顯，不過之後2個星期都冇咩太大嘅變化，加上牙骹位都幾痠軟，所以應該要連續做多幾次，個瘦面效果先會更加突出~
另外New Beauty嘅 Ultra V Lift Pro 無針埋線對我嚟講就非常驚喜！本身以為無針埋線都會用返HIFU能量，做完出嚟個效果會同Oasis冇乜分別，但點知又唔係喎~一做完療程個吓已經有幾明顯嘅拉提效果，就算過咗2個星期，個瘦面效果都仲keep到，而且仲有越嚟越瘦嘅效果，不過同Oasis嘅HIFU療程一樣，無針埋線最好都要keep住做，先至維持到最好嘅瘦面拉提效果~
服務方面，我就覺得2間都差唔多，New Beauty比Oasis多咗一part療程前嘅皮膚分析，可以俾客人了解多啲自己嘅皮膚有咩問題，其實都唔錯~以性價比嚟講，個人就覺得New Beauty略勝一籌，下面就分享返我今次個評分啦(5⭐為滿分)~
| Oasis 旋風式 HIFU 療程 | New Beauty Ultra V Lift Pro 無針埋線 | |
| 效果 | ⭐⭐⭐⭐ | ⭐⭐⭐⭐⭐ |
| 體驗過程 | ⭐⭐⭐ | ⭐⭐⭐⭐ |
| 痛感 | ⭐⭐⭐ | ⭐⭐⭐⭐⭐ |
| 服務 | ⭐⭐⭐⭐ | ⭐⭐⭐⭐⭐ |
| 試做價錢 | ⭐⭐⭐ | ⭐⭐⭐⭐⭐ |
見到個評分，相信大家都知我會推介New Beauty多啲啦~今次我放返我之前登記免費遢做無針埋線個條Link俾大家，唔洗錢架，大家有興趣不妨去試吓啦~
