我上一個blog距離以家我諗都半年有多啦,因為做左人地呀媽後真係冇咩時間可以做到自己野,但之後我會勤力d update大家! 呢一次好想分享一下呢半年入面自己既改變，做左人地呀媽之後個個改變大到自己都驚呀!
1.自然醒
人人都話做左人地呀媽之後自然醒係一個恩賜,各位準媽媽我想同大家講係真架!!!!!!自從呢個小朋係我個肚出左黎之後,自然醒呢一樣野就離我而去。坐月既時候,唔好話睡到自然醒呀,半夜你想訓一教好既,都好難好難,何況自然醒呢~Marvin好錫媽咪,係因為未到個半月既時候已經唔洗飲夜奶啦,所以媽咪就叫左有教好訓,但自然醒就一排都未肯返黎我身邊啦!(有d野我想補充既係,我每一朝起身都見到我個位豬隊友訓到好似隻豬咁,個一刻我好羨慕佢～)
2.自己既時間
自從Marvin唔洗食夜奶之後,我既生活開始變得輕鬆左d,因為每一晚要起身餵夜晚係一件好好好辛苦既事。因為唔好以為淨係餵一餵奶好快就可以訓返,因為事實往往唔係你諗得咁簡單,你餵完奶,又要掃風(Marvin係一個好難掃風既小朋友,我試過不停咁掃掃左9個字,先掃到出黎。),之後又要換片,再之後又要泵奶。呢一連串既活動過後你就可以訓一個鐘,因為你整完呢d野之後已經3個鐘,訓一個鐘之後你又要餵第二次奶。日頭既時間你淨係想訓教,仲講咩自己既時間呢~所以Marvin冇飲夜奶之後,總算有自己少少既自由時間。
3.生完記性差左？
生完之後記性真係差左好多好多,以前我記性都真係幾好,生完之後我真係成日唔記得’自己’野。我成日同Marvin出街,佢既全部野我都記得一清二楚,從來都冇帶漏佢既野。反而我自己同老公既野就成日唔記得,之後我發現左一樣點解生完會記性差左既原因。因為自從生完之後,無論你個腦或者係你既專注力都會去哂bb到,就算訓著左我聽到少少聲,我都會望下係咪Marvin醒左,出街街自己帶漏野唔緊要,帶漏左BB d野真係好緊要。所以我地生完唔係記性差左,係我地要兼顧既野多左好多好多,個腦入面要記好多好多野,專注力都用多左好多。
4.身型同外貌既改變
自從有左呢個小寶貝之後,我既身型真係改變左唔少!真係由一個100磅多少少既女仔變左120-130磅既小肥妹~生之前個個都話你咁後生好快就會瘦架啦,呢一句係好好安慰人既說話,但現實往往係殘酷既。我本身都想順產既,但因為開唔到既關係,所以變左開刀。生完諗住做下運動,點知個個都話開刀唔可以咁快做運動,我就一直係到等,等到以家半年先可以跑下步。生完我係有去紮肚既,但如果你諗住紮左10次佢會瘦,或者可以好似廣告咁,係唔得既~(可能只係得我唔得,其他媽媽可能成功)到以家做返運動啦,個人真係可以瘦返。但係個段岩岩生完又腫又肥既時間入面,我成日都同我老公講,我以家咩衫都著唔到,好醜怪!我老公真係一如既往不停咁安慰我,好多次都會同我講,其實瘦左好多架啦,慢慢黎比心機做下運動,好快就好瘦。接受同改變係一件好難既事,何況女人個個都注重自己既外表,但我相信做左媽媽之後,係冇一樣野會難到大家既！
5.夫妻之間
夫妻之間既改變係我冇預計過既一環,因為生左Marvin之後我既中心點就由我老公轉左去個仔到。我坐月既時候係我最感到困惑既時間,當時我問我既陪月,我話我對我老公有一種好陌生又好熟識既感覺,係我之前從未有過既感覺。陪月姨姨就對我講,因為我見到你比哂自己既愛同埋專注係BB到,可能你老公都有呢種感覺,不過佢冇同你講,你可以問下佢有冇呢個感覺。陪月姨姨一講完我好似比佢點通左咁,咁我當晚等我老公放工返黎我就問佢啦,原來佢一直都覺得唔開心,因為自從個仔出左世我好多時所有野都係比左個仔,完全忽略左我老公。後知後覺,我即刻分返d時間比老公,比佢知道我唔係淨係顧住個仔。各位準媽媽同媽媽,記得唔好忘記身邊既老公,其實佢地默默為你同呢一個家付出好多,將心入面既愛大聲講比老公知,等佢開心一下。爸爸其實就係呢個家既第二個小朋友,當佢小朋友咁錫,佢一定會好開心!
半年既時間真係好快過,眼見自己既仔仔一日日咁長大,以前仲係一定舊飯咁,以家識得認人,識得反抗。我好珍惜陪伴仔仔既時間,因為我知道佢地需要你陪伴既時間其實好短,我亦都好想陪伴仔仔做所有佢既第一次,希望佢大個左我可以分享佢既童年比知。各位準媽媽同媽媽們,我地一齊努力加油,為大家既小朋友一齊努力!
Dorismama’s Ig: Dorismt
Dorismama’s Facebook: DdorisM
