瘋狂復活節 ~Gram Cafe ＆Pancakes~

小卷同小立放復活節假，除咗諗去邊度玩，都要諗下去邊度食。一於趁假期玩得開心，食得盡興。小卷一直都想試梳乎厘班戟。就一於衝去試啦！

揀了Gram Cafe & Pancakes 就係Sogo 附近，少出城既信義妹都可以輕鬆到埗。餐廳地方寬敞，枱與枱之間有足夠空間，講祕密都唔驚隔離枱聽到。椅底有個籃俾你擺袋，唔駛攬住個袋，可以舒舒服服食野。

梳乎厘班戟 $138

呢個超人氣食品，每日只有3個時段供應，分別11點，3點，6點。每次只供應20份。想食既大家可以係供應前1小時排隊。

信義妹有幸食到啦！三層班戟疊高，配上半圓牛油，旁邊仲有忌廉。班戟鬆軟，有入口即溶既感覺。配上牛油份外香。另外忌廉奶味重但又唔會好甜。連唔太愛甜的信義妹都覺得好呀！

意大利黑松露醬虎蝦班戟 $138

甜既班戟成日都食到，咸既班戟都係第一次試。虎蝦配上黑松露醬香味，增加味覺層次。蝦唔會整到好乾身，蝦腸亦一拼清理乾淨。蝦頭帶有蝦膏，食落甘香美味。

沙律菜新鮮，唔會帶澀味。沙律醬唔會預先撈好，放碟旁，濃淡隨心。

到班戟啦！初初諗配鹹咪好怪，結果又出乎意料好食。

總結，不論鹹甜班戟都得大人小朋友歡心。環境舒適，親子閏蜜講祕密都得。洗手間都乾淨整潔。

地址: 銅鑼灣謝斐道535號Tower 535地下1號舖

信義藍星札記

Facebook Page

https://www.facebook.com/IncredibleShunyeemui/

Instagram

https://www.instagram.com/IncredibleShunyeemui/