Hello!大家好!我係軒軒 Marvin,我係3月7日係聯合醫院出世。
呢一次我媽咪想同大家分享係聯合醫院生我出黎既過程,我係一個出世8磅幾既大B(媽咪最後一次產檢既時候我都仲係6磅幾,醫生話佢出世最多都係7磅幾唔會咁重,媽咪話一早知道咁重就開刀生我啦!),因為我媽咪食左全餐。
本來我既預產期係3月4號既,但我係媽咪既肚入面太舒服啦,我根本都唔想出黎。3月5號既朝頭早,媽咪發現流啡,所以媽咪同爸爸就即刻入醫院,當時媽咪個心情係’嘩!BB終於肯出黎啦!’咁一早已經執哂走佬袋啦,媽咪同爸爸就去到聯合醫院既產房準備檢查同埋上病房啦!因為每一個媽咪流啡既情況都唔同啦,有D媽咪流啡完好快就有陣痛,有D媽咪就好似我媽咪咁,流完啡之後隔左一兩日先出黎。媽咪5號入院,一直都冇特別既反應,去到6號既朝早醫生黎檢查問媽咪想唔想出院,媽咪緊係話想啦,醫生就檢查一下,發現開左兩指,醫生就對媽咪講’以家開左兩指,唔好出院啦,因為分分鐘都要返返黎架啦’醫生檢查完子宮之後,因為外來既刺激同埋醫生有按摩一下子宮之後會出現流血同埋有少少痛,係正常既!一直到下就媽咪訓醒一教之後發現好似有D發燒(媽咪提提各位準媽媽,係待產既時候,每次去完洗手間每次接觸完其他野,一定要洗乾淨隻手,因為醫院既洗手間係好污糟好多細菌,我媽咪就係因為洗手洗得唔乾淨所以細菌感染發燒)姑娘知道媽咪發燒之後佢地都好緊張。隨後媽咪開始陣痛,再發現我既心跳又開始好快,醫生都黎左幫我地兩個檢查。醫生檢查完之後,就決定落產房準備人手穿水。
去到產房既時候,媽咪已經冇發燒我既心跳都正常返。醫生就幫媽咪人手穿羊水啦(媽咪話之前聽人地講話人手穿手會好痛架,但媽咪就話其實一D感覺都冇,醫生幫媽咪穿左手之後媽咪仲問醫生穿左架啦!)穿左水之後就開始陣痛加劇啦,陣痛既次數都越黎越密。呢一個時候姑娘就會問媽咪要唔要聽D音樂呀,要唔要聞笑氣呀?媽咪緊係兩樣都要哂啦,每一次陣痛既時候，媽咪痛到連笑氣都遞唔到黎聞,好才有爸爸幫媽咪手,每一刻都留意住媽咪。媽咪話之前聽人講聞笑氣會聞到好想嘔,又有好大陣膠味,原來係真!聞到媽咪又暈又想嘔,但唔聞又好痛好痛。陣痛左兩個鐘,醫生入黎檢查媽咪同我既情況,但發現我既心跳越黎越快,以媽咪人手穿水同打催生針之後都冇開過任何度數。醫生就決定同媽咪緊急開刀……呢一刻媽咪痛到都唔識驚啦,淨係想我快d出黎,但爸爸既心情就好緊張啦!
護士姐姐就推左媽咪同我去手術室,當時媽咪仲keep住陣痛,但因為麻醉既時候需要屈曲個身體,大家試諗下本身懷孕既媽媽去做呢個動作已經係好難,何況我媽咪係keep住陣痛一路要做個蝦米既動作,個陣好多醫生同護士姐姐都鼓勵媽咪。打完麻醉針之後,媽咪話簡直係天堂呀!因為媽咪已經感受唔到痛啦。之後其實一d感覺都冇既,手術既過程中,醫生都一路講解緊做咩,令到媽咪冇咁擔心。醫生講左句:以家你會感受到扯扯地感覺,因為我地會將bb拎出黎。之後就聽到我既喊聲,我就出左世啦!護士姐姐幫我做完檢查之後,因為我有d發燒,所以比媽咪錫左一啖之後,我就要去病房啦!但媽咪既情況就唔係幾好啦,因為手術差唔多完成既時候,媽咪既血壓突然跌到好低,醫生話：唔可以上病房先,因為佢血壓好低,出去觀察先,如果情況keep住係咁,就入icu。(當時其實媽咪已經因為血壓低暈左,只係聽到外界既聲音,咩都睇唔到,最後聽到既對話就係呢個)好好才既係媽咪過左2個鐘之後情況開始好轉,醫生可以比媽咪上病房啦!
上到病房之後,媽咪話個到有好多bb,又見到好多媽咪岩岩生完就要照顧bb,但因為我出世發燒所以我就唔可以同媽咪一齊要係初生嬰兒病房,咁樣媽咪每日就落有房到比奶奶我。過左一星期我就出院,遲左媽咪3日出院,因為我要打一星期既抗生素。
(我係病房個陣,爸爸拖住我隻手仔)
我同媽咪好想係到多謝聯合醫院既醫生同護士姐姐,因為佢地照顧得我同媽咪都好好,係初生嬰兒病房既時候,每一個護士姐姐都好好,好有愛心咁照顧我,雖然佢地要照顧好多bb,但佢地都好盡力做好佢地既本份。至於媽咪呢,媽咪都好多謝係產後房既護士姐姐,佢地好好,成日都好關心媽咪,因為我同媽咪係唔同既病房,所以每一個夜晚護士姐姐都會提媽咪要手擠奶比得,有時媽咪既手勢唔岩,護士姐姐會親手教你,好多時都會鼓勵媽咪。如果各位準媽媽有咩問題可以隨便問呀?因為我媽咪知道好多準媽媽都對醫院既生產過程好好奇,所以佢都希望可以幫到大家~
