#Travel

【背遊達人】歐洲跨境巴士全攻略

*本頁面的文章內容由Blogger撰寫、提供及發佈,不代表本站立場。本站對所有Blogger文章的圖文內容、立場、真實性、資料準確性,均不負任何法律責任。

Advertisement

上回提到,去歐洲,想一次過去幾個國家,跨境巴士、廉航、火車,點樣揀至抵?至舒服?至慳時間。今個星期,集中火力,介紹5間歐遊跨境巴士公司,保證窮遊歐洲無難度!

1/ 英國 - National Express

先講最多香港人喜歡,我又最熟架步嘅國家,大不列顛帝國。英國最大型長途巴士公司National Express必然是遊英首選。它班次多、座位舒服、行車安全、服務可靠、價錢合理。

要購買最抵價車票,一字記之曰:早!早啲計劃行程,我習慣提前最少一星期網上買票,價格普遍相宜。例如:最熱門路線,倫敦至劍橋,車程2.5小時,最貴單程可達30鎊(約HKD$300),但我提早買票,平均每次票價只需11鎊(約HKD$110),平一半有多!官方網站

 

2/ Mega Bus

Advertisement

背遊英國,第二個長途巴士選擇 Mega Bus。簡單來比較,它比較貼地、喱民,車廂似雙層九巴。為提高競爭力,Mega Bus不時推出1鎊出倫敦優惠,有時由牛津、伯明翰,甚至曼徹斯特,4-5小時車程,都只售1鎊(HKD$10),但要搶到,就要花少少心思和耐性捕捉。

所以,想背遊英國,由倫敦一路向北,殺上蘇格蘭的朋友,不妨每次購買長途巴士票時,比拼一下兩間巴士公司的時間、價格。官方網站

3/ Flix Bus

講完英國,就講歐洲,準確啲講,應該係西歐。Flix Bus 是一間德國公司,提供歐洲,以至美國的長途巴士服務。我八成的歐遊交通,都是坐Flix Bus。可以咁講,你說得出的鄰國大城市,都有點對點班次服務。

Advertisement

價格參考:法國巴黎往比利時布魯塞爾13歐、德國柏林往捷克布拉克19歐、瑞士蘇黎世往意大利米蘭19歐等。換言之,唔駛HKD$200,已經可以穿州過省,時間靚的話,分分鐘連一晚住宿都慳返。

以上價格,唔駛搏老命搶,只要合理地提早計劃,願意因價格調整出發時間,就唔難買到。

此外,Flix Bus仲有一隻套票:99歐,任揀接駁5個城市,換言之,如果你想長距離歐遊,每程車票貴過20歐,買呢個99歐套票,就更加優惠。官方網站

4/ Euroline

Advertisement

Euroline 雖然也覆蓋英國、法國、西班牙等西歐地方,但在西歐,車次選擇未及Flix Bus方便,但由中歐開始,殺至東歐,Euroline又跑贏Flix Bus。Euroline 是我背遊羅馬尼亞、塞爾維亞、波斯尼亞和黑塞哥維那等東歐國家,最主要的交通工具。官方網站

 

5/ Ecolines

Overall,Ecolines係我最喜愛的歐洲跨境巴士公司!原因好簡單,因為佢有電影睇!車上仲有免費咖啡或茶、洗手間、服務員,有坐飛機的感覺。Ecolines服務集中於東歐,例如我背遊波羅的海三國:立陶宛、拉脫維亞、愛沙尼亞、莫斯科等,就是選用Ecolines。東歐物價普遍低,所以Ecolines車票特別相宜。

 

Advertisement

以上五間巴士公司都有手機應用程式下載,背遊歐洲,在不同區域,查詢相應巴士公司,就能更快選購最實惠的交通方法。

 

作者:

廚職背遊 梁芷靈

廚職背遊 460日:何文田坐車到新加坡、德國工作假期、希臘坐車返香港、西伯利亞鐵路。《經濟通》DIVA Channel、《gini》智能理財平台專欄作者。曾赴英國留學、英國廣播公司工作。下個計劃:去英國做老闆!

Advertisement

*本頁面的文章內容由Blogger撰寫、提供及發佈,不代表本站立場。本站對所有Blogger文章的圖文內容、立場、真實性、資料準確性,均不負任何法律責任。