與海蠣相聚 ~莆田~

信義妹向來愛蠔，特別係生蠔，但自從備孕開始就同蠔絶緣。。。。數一數，都有好幾年了。到而家仍然同生蠔緣薄。。。。
由朋友口中得知，近日莆田做海蠣節，心諗，正呀！唔食得生蠔，熟既都照殺。(真係想食蠔食到癲咗。。。。。)

海蠣節有幾款海蠣特別菜式，分別係酥炸椒鹽海蠣，頭水紫菜海蠣煎蛋，漁民鹽漬海蠣，福建特色海蠣煎和江口家鄉海蠣湯。 $188可以6款揀2款。

漁民鹽漬海蠣
呢款跟信義妹食的漬螺相似。

信義妹食起來特別有親切感，撈粥撈飯撈米粉確實一流。講明鹽漬當然佢的味道唔會太淡，鹹味又無蓋過海蠣的鮮甜。粒粒飽滿的海蠣咬落軟滑，裙邊爽脆，口感豐富。

江口家鄉海蠣湯
用椰菜花，蕃茄，蛋花煲出湯底香滑，加上海蠣鮮甜，令到湯的味道提升。蔬菜的清甜唔會同海蠣既鮮甜互搶，相對鹽漬海蠣有種清新的對比。喜愛清淡，但又愛海鮮鮮甜的，就適合呢個湯啦！

九轉小腸
用12種香料文火滷製，而3小時反覆清洗，沒有肥膏，口感煙韌又不失爽脆。

汁沒有太濃，少少鹹味加上有爉台持續保溫，令到餸菜時刻都保持最佳的狀態。

酥炒芋芯
跟反沙芋相似，但比反沙芋健康。比反沙芋少糖，外脆內軟。面層的糖薄薄的一層，少少甜，又唔會蓋過芋香。

蝦苗拌頭水紫菜
呢個作為前菜最好啦！因為帶酸，食落好開胃，而有蝦苗有少少脆的口感。紫菜順滑，唔會食到係喉嚨唔上唔落。

整體都食得好滿意，下次仲想試埋其他菜式。環境坐得舒適，對於帶住小朋友的都唔會好迫。地點鄰近地鐵站，所以都容易搵到。

地址：尖沙咀彌敦道118-130號美麗華廣場2期2樓269-270號舖