Column

結婚有幾多嘢要預備?傾rundown篇

Advertisement

唔知大家收過幾多款rundown呢?我見過嘅rundown款仲多過我着姊妹裙嘅款呀!姊妹裙都話唔同款你都可以着得好靚,rundown就冇呢支歌仔唱喇。我收過一啲款係寫得好仔細好清楚嘅,即係點呀?即係啲字好似寫論文咁多囉!嗰日咁忙其實真係睇唔到㗎⋯⋯Big day嗰日,好多時都係喺突發嘅情況下,你要急住睇返張rundown。我企喺度望住張嘢,搵返屬於我自己嘅嗰一欄,再掃左邊搵返去到邊一個時間(time slot個row係可以細分到斷分鐘計),啲時間咪咁樣溜走晒囉!

 

我見過好多嘅rundown都會分好多欄位,每個兄弟姊妹各一欄,咁樣好似分得好仔細,但係我個人就覺得有個唔好處,就係每個人淨係會掛住睇自己嗰欄做啲乜嘢,唔會理其他人做咩,到big day嗰日,可能做到某一part嘅時候,就會有好多人喺度問:「呢樣嘢邊個負責架?」「嗰樣嘢又係邊個負責架?」咁樣,要避免呢一個情況呢,我就會建議分欄最多就淨係分四欄(兄弟、姊妹、伴郎、伴娘,各一欄),咁大家就會好清楚每一個人嘅職責,睇起上嚟呢亦都方便好多。

Advertisement

大家有做過兄弟姊妹都明白,到嗰一日情況其實好容易會比較混亂,好多時本身你係要做呢樣嘢嘅,你又要去幫手做其他嘢,但你要明白呢個世界真係好多人好鬼鐘意推三推四,原本唔係佢負責嘅,但真係想搵佢幫手嘅時候,佢真係會唔做,又或者喺度阿吱阿咗,呢啲兄弟或者姊妹,就好似你公司啲老屎忽咁,無得你揀(之前都有講過啦,兄弟姊妹你未必個個識架,就算本身係好朋友呀,平時玩就話啫,真係做嘢嘅時候又未必係嗰個樣架嘛!),咪講笑,真係大有人在。

我試過見過有人話其實佢冇睇過份rundown,佢連自己要做乜嘢都唔知,成日好似喺度發緊夢咁,見佢係兄弟/姊妹咋,唔係真係想兜巴車埋去再嗌佢返屋企!其實做兄弟姊妹,就好似喺公司做嘢咁,食嘢唔做嘢嘅有(真係淨食唔做,頂佢!),鍾意側側膊求求其嘅又有(喂你好朋友嘅人生大事,好話唔好聽得一次架咋大佬!),老細落嘅order唔清楚,同事根本上好難跟好難做,盡責都話呀, 但Hea住做嘅大有人在,個project咪好易亂囉!

 

仲有呀!Rundown多數會包埋物資表呀咁,方便兄弟姊妹對嘢同埋執嘢,呢啲物資表通常都要分場地去排嘅(好似酒店呀、教堂呀、男女家屋企呀咁),我見過有啲物資表係亂到唔make sense嘅⋯⋯例如明明嗰樣嘢唔需要去教堂,但係又寫住要喺出門嘅時候跟手拎去教堂呀咁,再細問一吓,先知道原來佢嘅意思係因為出門嘅酒店同夜晚嘅酒店係唔同地方,出門之後其實係要清場嘅⋯⋯咁其實你就應該寫得清楚啲,出門清場嘅物資要分開兩個地方,一個就係去酒店、一個就去教堂,大家就會清楚好多,亦都唔驚有甩漏啦。(唔好睇小個表,試過去到教堂發現副油畫唔知去咗邊架真係!)

Advertisement

當然都好明白一對新人有好多嘢要攪,有時有啲位未必諗得咁仔細,或者寫得唔清楚,唔緊要架!早啲俾份rundown我哋啲兄弟姊妹,咁多對眼幫手睇,比完意見一對新人,返去執返份嘢俾一個final version大家,咁就清楚好多啦!但如果你係結婚前一日先俾份嘢大家嘅話,咁對唔住喇,唔係唔想幫你,但真係無能為力,到時真係好易攪到大家又亂又辛苦,有啲嘢可以last minute,但有啲就⋯⋯最好唔好啦!

#其實真係唔會有心機睇論文式rundown
#呢單嘢唔係我跟開
#老屎忽老是常出現
#我做得多姊妹但我不是老屎忽
#唔睇rundown不如你返屋企訓啦
#亂嘅物資表仲慘個做audit對數

原圖來源:電視截圖

Advertisement
iambridesmaid
大大話話都做過不下十次嘅姊妹/ 伴娘,希望同大家分享做姊姊嘅開心同辛酸,等各位即將要幫手做姊妹嘅你哋,有返個心理準備。