Girlab

講到玩新郎兄弟呢PART,相信姊妹們都比較興奮,亦都會好踴躍咁俾意見,務求以玩殘一班兄弟為目的,但新娘子多數都會錫住老公,嗌班姊姊就住玩,咪整到佢個寶貝老公,兄弟喇喎,就任我哋魚肉啦!玩還玩,我哋班姊妹都唔會亂嚟嘅!一陣好似網上面啲新聞話搞到婚都結唔成,又或者成日要同班兄弟面左左,搞到兩公婆有條刺就唔好啦。

 

有幾多嘢要預備?玩新郎兄弟篇 -           1       800x459 - 有幾多嘢要預備?玩新郎兄弟篇

其實玩遊戲都係旨在俾新郎知道娶老婆唔係容易,係要過五關斬六將,要排除萬難先可以娶得美人歸,辛苦少少都要㗎喇!依家最常現嘅遊戲都係要班兄弟跳吓舞咁,喂,為咗幫到兄弟娶老婆,跳返part舞都不為過丫!我就真係見過有啲兄弟好唔合作喇,喺度行行企企,點都唔肯跳舞,玩其他遊戲又唔投入,你唔好返屋企!大佬呀做老臨都要交功課啦,何況你係兄弟!乜都唔肯做就唔該返屋企啦!

咁我又唔係一沉百踩嘅,都見過有啲兄弟好玩得架!呢一個遊戲呢我就印象最深刻,所需材料好簡單,你只需要一張保鮮紙,同埋你想佢地食到嘅醬(建議醬一定要結身,太過液態會整污糟,榛子醬都係一個唔錯嘅選擇!),將醬塗喺保鮮紙嘅兩邊,記係係對鏡面咁塗呀,之後要兩個兄弟一人企一邊,用條脷去賴返乾淨,成個過程仲激過一對新人咀咀,正呀!其實姊妹們諗遊戲之前都會摸下兄弟嘅底勢嘅,問清楚新郎同兄弟有咩玩得,有咩唔玩得,諗好晒啲遊戲之後又會俾新娘過目,新娘都會衡量吓自己老公同班兄弟玩唔玩到,如果最後玩遊戲仍然有問題、有不滿,我諗歸根究底都係溝通問題,所以話,其實兄弟姊妹嘅角色都好被動,一對新人溝通唔夠,最後唔只搵著班兄弟姊妹攪,其實都係搵著自己嚟攪!

 

有幾多嘢要預備?玩新郎兄弟篇 - tongue2 800x775 - 有幾多嘢要預備?玩新郎兄弟篇

#玩唔起就返屋企
#諗起可以玩殘班兄弟就興奮
#兄弟們啲底線仲高過條底褲
#兄弟間得返一張保鮮紙嘅距離好有愛hehe
#玩兄弟前問清楚好過一陣面左左

原圖來源: 電視截圖

iambridesmaid
大大話話都做過不下十次嘅姊妹/ 伴娘,希望同大家分享做姊姊嘅開心同辛酸,等各位即將要幫手做姊妹嘅你哋,有返個心理準備。