以前香港都冇乜點樣搞bridal shower,最多都係同班姊妹食餐飯咁,冇咁多花臣。依家結婚個個都要搞番個bridal shower,其實又唔算好正統,我個人覺得只係用多一個藉口去搞番個party,當然我知道有啲朋友真係會好認真咁去搞,甚至乎請返個舞男返嚟我都見過,大家開開心心玩返晚,其實都真係幾開心嘅。

我自己參與過嘅bridal shower呢,就比較簡單,租間酒店房,會有主題有dress code,姊妹們準備好晒啲嘢食,佈置好晒間房,成班姊妹開開心心食下野,影吓相,傾吓心事過返一晚。甚至乎想節儉啲嘅話,依家好興租嗰啲party room,唔過夜(其實有得過夜不過冇床,大家年紀大真係瞓得唔舒服,又玩唔到成晚通宵),由早玩到晚,又係一個選擇,Party room依家啲設備都好多,廚房又有,波波池又有,想唱K又得,甚至乎連VR都有得玩,如果佢哋有埋張舒服啲嘅床,真係贏晒啲酒店啦。

講起酒店呢我都有一個經驗,曾經間酒店主打有間房可以租出去俾人做bridal shower,點知訂定咗去拎房嗰日,佢有人數限制(我哋七個人),佢話最多四個人,唔嘈得,仲要提我地唔好整污糟佢嘅地氈,因為好貴喎,仲未講佢要加我哋錢添呀!搞到我哋嗰日一心諗住好好咁慶祝,未開始就已經㷫烚烚,唔係俾咗錢嘅話,我哋真係想即刻轉場。後尾都聽過有朋友有類似嘅經歷,不過佢哋比較硬淨,嘈到間酒店退翻啲訂比佢哋,之後佢哋就轉咗場。呢間酒店已經永久俾我black list,有乜都唔會再幫襯。

如果有得搞,成班姊妹一齊去旅行就梗係最好不過啦,雖然我自己就未試過,不過聽落又真係幾開心嘅(唔計去旅行要額外煩多啲嘅嘢嘅話,你知成班friend去旅行又係另一個麻煩嘅topic嚟架啦),如果有人去過又有啲搞笑嘅經歷,不妨可以話我知,大家分享下嘛!

#你鍾意酒店定係party room
#有冇dress code好介紹
#唔該我想要舞男聯絡電話
#唔夠大隻唔收貨

原圖來源: Girls Generation-Party MV

iambridesmaid
大大話話都做過不下十次嘅姊妹/ 伴娘,希望同大家分享做姊姊嘅開心同辛酸,等各位即將要幫手做姊妹嘅你哋,有返個心理準備。